Cada mucha abusa ta uno di mas, esaki ta e palabranan di Lider di Proyecto di sector di salubridad publico, sra. Grace maduro, cu ta trahando incansabel hunto cu e profesionalnan den veld di salud pa cu e trayecto di implementacion di e Codigo di Proteccion.

Segun sra. Maduro, e Codigo di Proteccion a duna e oportunidad pa train y ekipa nos profesionalnan den sector di salubridad publico a base di e metodo di “Signs of Safety”. Signs of Safety ta duna e profesionalnan e herment pa por midi un situacion, ora tin sospecho di abuso di mucha. E Codigo di Proteccion ta hinca concreto den otro y ta duna un amplio splicacion di con ta maneha cu caso di abuso di mucha cu e meta principal pa yega na e siguridad di cada mucha y hoben na Aruba.

Den sector di salubridad publico actualmente ta den e trayecto caminda Wit Gele kruis y Jeugd Gezondheid Zorg ta cla pa cera un convenio, un “samenwerking protocol” di tur e pasonan concreto cu tin cu implementa, ora ta trata di un caso di abuso di mucha. Esaki ta importante mirando e echo cu den e sector aki nos tin cu anda cu “medisch geheim” di cada cliente. Tur instancia a ricibi tur informacion y training den e lunanan cu a pasa y lo continua e trayecto den e luna venidero.

E meta principal di e Codigo di Proteccion aki ta pa percura pa tur mucha na Aruba por crece den un ambiente di siguridad y fortalece e structura di cuido y trahamento hunto entre e profesionalnan dentro di e instancianan esencial, cu ta forma un parti hopi importante den e bida di un mucha y un hoben. Den e etapa final di aña 2020 y comienso di aña 2021 lo bay tuma luga diferente accion concreto y determinante dentro di e 4 sectornan pa asina finalisa e preparacion di implementacion di e ley di Codigo di Proteccion.