Husticia

Implementacion di Codigo di Proteccion den sector di husticia 

Codigo di Proteccion ta un di e proyectonan grandi di Sociaal Crisis Plan cu ta den pleno preparacion pa wordo implementa oficialmente y cu ta ancra den Ley den e sectornan di Husticia, Enseñansa, Social y Salubridad publico. Den e ultimo lunanan a tuma luga diferente trayecto, training, workshop y tayer den tur 4 sector como parti di e preparacionnan pa e trayecto di implementacion di e Codigo di Proteccion.

E enfoke ta pa ekipa tur profesional den e sectornan cu ta traha directamente cu hoben y mayor, pa asina nan por maneha un caso di sospecho di abuso si mucha debidamente, uzando e Ley di Codigo di Proteccion.

“Den sector di husticia a cuminsa traha cu e instancianan y stakeholdersnan cu ta traha directamente cu mucha, hoben y mayornan na prome luga. A tuma un “top-down approach” pa asina sigura e cooperacion di parti di e directivanan di e instancianan den sector di husticia pa cu e trayecto di implementacion di e Codigo di Proteccion cana e caminda corecto. Den e trayecto aki a cuminsa cu un analisis intensivo un “nul-meting” riba e procesonan y proceduranan actual di cada instancia ora ta trata di señala y pasonan cu ta wordo tuma pa maneha casonan di abuso di mucha. Parti e trayecto aki ta cu e profesionalnan ricibi training pa cu e metodo central di “Signs of Safety” cu lo wordo uza den e Ley di Codigo di Proteccion ” - Dorilis Werleman, Lider di Proyecto di Husticia a elabora.

E meta principal di e Codigo di Proteccion aki ta pa percura pa tur mucha na Aruba por crece den un ambiente di siguridad y fortalece e structura di cuido y trahamento hunto entre e profesionalnan dentro di e instancianan esencial, cu ta forma un parti hopi importante den e bida di un mucha y un hoben. Den e etapa final di aña 2020 y comienzo di aña 2021 lo bay tuma luga diferente accion concreto y determinante dentro di e 4 sectornan pa asina finalisa e preparacion di implementacion di e ley di Codigo di Proteccion.
E cambio cu e Codigo di Proteccion lo trece den sector social ta cu tur instancia y profesional lo bay traha mas transparente, eficiente y structura segun e metodo describi den e Ley den casonan di abuso di mucha. Desde luna di september ta sintando cu tur stakeholders y instancianan social cu ta un parti di e preparacionnan di e trayecto di implementacion di e Codigo di Proteccion. “E reaccion di parti nos profesionalnan ta un alivio cu porfin tin un Ley di Codigo di Proteccion cu ta structura e proceso y alabes ta proteha nan como profesional den caso di abuso di mucha” - Efraim Suurendonk, Lider di Proyecto di sector Social ta elabora.

Actualmente tin alrededor di mas cu 110 instancia y centro di cuido cu ta preparando pa e trayecto di implementacion di e Codigo di Proteccion. Den lunanan venidero di aña 2020 lo tuma luga diferente accionnan dentro di e sectornan pa asina finalisa e preparacion di e ley di Codigo di Proteccion. Ta premira cu lo finalisa e preparacionnan di e Ley di Codigo prome cu fin di anja 2020. 


Pa mas informacion tocante e Ley di Codigo di Proteccion por tuma contacto cu Lider Nacional di Proyecto sra. Sue-Ann Ras via email sueann.ras@gobierno.aw.

HUSTICIA

E manera cu bo ta acerca bo cliente cu bo preocupacionnan ta sumamente importante. Den un combersacion tambe ta sumamente importante pa no solamente papia di e preocupacionnan, pero tambe di e potencialnan di bo cliente. E intencion semper ta pa inicia ayudo y mayoria biaha e mayornan kier ayudo, pero no sa con pa cuminsa. Por semper pidi Bureau Sostenemi pa conseho con pa papia cu mayor, prome cu bo tuma paso 3 di Codigo; papia cu mayor y e menor.

Na momento cu nos constata insiguridad durante trabou, ta hopi dificil pa ignora esaki. Esaki ta exigi di bo como profesional, pa para un rato cu bo trabou normal y focus riba otro aspecto cu hopi biaha bo no ta mucho conoci cu ne, esta con pa anda cu maltrato. P’esey ta asina importante pa papia cu un colega, supervisor of Bureau Sostenemi pa haya conseho. Y despues papia cu e persona(nan) en cuestion y wak te con leu bo mes por brinda ayudo, por facilit’e cu informacion of dun’e conseho. Hunto lo bo sali afo y hopi biaha e solucion no ta asina complica y no ta topa e tipo di casonan aki riba un base diario, pa bisa cu bo lo hay’e mas druk. Un cos ta sigur, haci nada paso bo ta druk, ya no ta un opcion y den cualkier funcion cu bo ta, ta casi imposibel pa ignora siguridad y proteccion di un mucha.

Como ciudadano bo tin e opcion pa keda anonimo. Como instancia bo ta bay comparti informacion personal di un persona. Pa por haci esaki, mester pidi permiso di e persona concerni. Mayoria biaha esaki ta posibel pa haci. Por tin caso excepcional, unda esaki no lo ta posibel, mirando cu bo ta pensa cu e lo trece peliger pa e menor of bo persona. Ley awo ta duna bo e derecho di notifica (meld) un caso, SIN PERMISO di e persona en cuestion. Bureau Sostenemi y Voogdijraad lo purba, mas cu ta posibel, pa wak si por uza otro manera pa drenta e caso, pero e momento cu bo comparti informacion como instancia, e cliente hopi lihe por saca afo di unda e informacion ta bin. Tambe ta hopi dificil pa confronta un cliente cu informacion sin divulga di unda e ta bin. Ta opta pa ta habri y semper por wak kico otro por haci pa keda sigur y protegi como profesional.

Bureau Sostenemi ta apunta pa tuma tur keho di abuso di mucha for di e ciudadanonan y e profesionalnan. Di nan banda nan ta duna conseho na e notificador (melder) di kico nan mes por haci pa yuda e menor. Si esaki no ta suficiente, Bureau Sostenemi lo haci investigacion, mirando cu nan por pidi informacion di un menor na otro instancia. Esaki por indica ki tipo di ayudo e famia mester, pa por yega bek na siguridad di e menor envolvi. Na momento cu Bureau Sostenemi investiga y bin na cla cu e mayor no kier coopera of no ta capacita pa trece e mucha den siguridad, lo pidi Voogdijraad ayudo pa asina wak si mester un medida di proteccion di mucha (Kinderbeschermingsmaatregel). Voogdijraad so ta apunta pa por pidi esaki na corte. Banda di esaki Voogdijraad ta asisti e mayornan cu areglo di bishita y areglo di alimentacion.  

© 2023 All Rights Reserved | Hand crafted by: Qwihi